Mera aqida hai baroz-e-mehshar falak pe yeh ahtamam hoga

Mere khayalon se bhi ziada wasee tar ik muqam hoga
Aqidaton ke chaman khilenge,mussaraton ka nizam hoga
Gulon ko nisbat ali se hogi kali pe zehra ka naam hoga
Wilae-e-hub-e-ali ki barsat ka ajab lutf aam hoga
Yeh anbiya sab wazir hoonge,to sadar mera imam hoga
Mashir masoomeat ke paale,ke adal se jin ko kaam hoga
Mohbatoon ki hawa chale gi,hawa mein haq ka payam hoga
Kahin pe zehra ke pasbanoon mein aik fizza ka naam hoga
Kahin dar-e-qasar bint-e-zehra pe sajda subah-o-shaam hoga
Mera aqida nahi hai jhoota yaqin hai yeh ahtamam hoga
Yeh aks hai aik saltanat ka,hussainiat jis ka naam hoga
Kahin pe baqir uloom banten ge ilm ka lutf aam hoga
Kahin pe jaffer ke gird ahl-e-khuloos ka asadhaam hoga
Kahin pe moosa riza ki janib se mominon ko salam hoga
Kahin janab ali raza se kisi payamber ko kaam hoga
Kahin taqi bazm atqiya ka salam lenge kalam hoga
Kahin naqi masnad niqawat pe wakf-e-altaf aam hoga
Kahin hasan askari ki mehfil mein zikr-e-khair-ul-anam hoga
Kahin kisi takht me mere choduain(14)ali ka qayam hoga
Kahin pe nare ali ali ke kahin durood-o-salam hoga
Har ik mekash ke hath mein salsabil-o-kausar ka jaam hoga
Magar tabbara kiye bagair uss ko mun lagana haram hoga
Har ik imarat khuda ki kudrat ka aik naksh-e-dawam hoga
Khain mohammad ki muskurahat kahin ali ka kalam hoga
Kahin hasan ki hasin soorat pe zairon ka salam hoga
Kahin pe mazloom-e-karbala ke juloos ka ahtamam hoga
Kahin pe sajjad ki sawari ka zehan mein ahtamam hoga